Shqiptaret shtrengojne rrypin ne Greqi

Emigrantët shqiptarë që punojnë dhe jetojnë në Greqi pritet të ndiejnë vështirësi të reja ekonomike dhe financiare prej  paketës së re të masave që u votuan nga Parlamenti Grek pak ditë më parë. Artikujt më të domosdoshëm për jetesën pritet të shtrenjtohen pas rritjes së  taksave për artikujt e konsumit të përditshëm. Sipas vendimit të Parlamentit grek që nga data 1 qershor 2016,  rritet me një përqind  Tatimi mbi Vlerën e Shtuar  duke shkuar nga 23% në 24%. Prej  1 qershorit do të rritet  edhe taksa  e  automjeteve. Ndërkaq disa rritje taksash  parashikohen të nisin efektet  më 1 tetor kohë kur do të rritet edhe taksa e posaçme e konsumit të naftës për ngrohje. Sipas shtypit  që del në gjuhën shqipe në Athinë  vitin e ardhshëm  priten taksime të reja si ato për cigaret elektronike, për kafen, për  televizionin kabllor, për  telefoninë fikse dhe  internetin. Rritje pësojnë edhe taksat e konsumit për gazin, benzinën pa plumb dhe naftën për automjetet. “Lajmet nuk janë aspak të mira edhe për pronarët e pasurive të patundshme” , shkruan “Gazeta Tribuna”. Sipas saj, me ligjin e ri shumë prej pronarëve  do të paguajnë madje edhe tri herë më shumë taksë, në krahasim me vitin 2015. Masat e reja shtrënguese të qeverisë greke parashikojnë kursime me vlerë 1,8 miliardë euro, dhe krahas  rritjes së taksave  parashikojnë  dhe krijimin e një  fondi për privatizimet. Masat erdhen si kërkesë e kreditorëve ndërkombëtarë  me qëllim dhënien e një  kësti tjetër të  kredisë prej 86 miliardë eurosh që iu akordua Greqisë me paketën e tretë të shpëtimit, vitin e shkuar. Emigrantët shqiptarë përbëjnë pjesën dërmuese të të huajve në Greqi dhe vitet e fundit po përballojnë  vështirësi nga efektet e krizës ekonomike dhe financiare. Sipas Ministrisë  së Brendshme greke  vlerësohet se rreth 384.000 shqiptarë  kanë përfituar Lejet e Qëndrimit  nga rreth 553.000 emigrantë të huaj që ndodhen gjithësejt në Greqi. Në numrin e përgjithshëm të shqiptarëve përfshihen edhe  rreth 43 .000  emigrantë që kanë përfituar shtetësinë greke.